top of page

9 Tahun 6 Bulan, Inang St. P.M br Silaen Mandalani Pensiun sian Panghobasion Sintua

Ndang hapalang las ni roha molo dung sahat ulaon hasintuaon di tingkina. Songon na masa di HKBP Bogor (29/01/2023). Ninna pandita resort ma: Na marpungu do hita nuaeng di bagas joro ni Tuhanta rap dohot sintuanta na naeng mandalani ombas pensiun sian ulaon hasintuaon.

Ima inanta Ny Simanjuntak / St. Piolenta Lydia Mariany br Silaen, 65 taon/ 7 Desember 1957 (siian huta Jerusalem).


Didok pandita ma tu nasida. Di hamu dongan na hinophop ni Tuhan Jesus i. Nunga digohi hamu pangoloion na pinadanhonmuna na jolo uju manjalo tohonan sian Tuhanta i, mandok: Sahat ula ulaonmi! Alani tama do unduk hamu mandok sadarion mandok mauliate tu Tuhanta i na patauhon hamu marhobas hombar tu tohonan na sahat tu hamu. Na tama do nang huria on manghamauliatehon tu adopan ni Tuhan Jesus Raja ni Huria i huhut mangido asi ni rohaNa anggiat parbue ni na hinobasanmuna na saleleng on gabe pelean na hushus jala mamboan pasupasu tu hagaganda ni na porsea dohot hatotogu ni haporseaon di angka hinobasanmuna.


Dungi didok pandita ma muse Marhite tangiang: Sai tambai ma hiras ni roha dohot hahipason nasida laho mandai hinauli ni tingki pansiun songon jolma na na marpanghilaan, na marroha jala na martondi hombar tu lomo ni roham.

Togutogu jala ramoti ma nasida di angka ari-ari ni hatuaonnasida tu joloan on, asa tongtong nasida manaili tu ho di bagasan sandok lomo ni rohaM, ai sian Ho do haroroan ni hadameon dohot sude sonang ni roha di bagasan Tondi Parbadia.

Pasu-pasu ma nang sude keluarga ro di sisolhot nasida, asa rap mangolophon jala manghamauliatehon pasupasu na jinalo nasida sian Ho.

Angkup ni i marpamuati ma rohaM di nasida muda hagaleon, dohot hahurangan nasida di nasa pangulaon, parsaoran dohot panghobasion nasida di tongatonga ni huriamon, sesai ma i ala holong ni rohaM dohot asi ni rohaM.


Manjaha SK Pensiun ni nadua sintuai, najinaha ni Ketua Parartaon Amang St. Maradu Silaen, dohot mensahkan sian Amang pandita uluan ma: Ale St Piolenta Lydia Mariany br Silaen (huhut masijalangan). Mardongan pos ni roha di Debata Ama, dohot anakNa Tuhan Jesus Kristus dohot Tondi Parbadia i, sadari on, Minggu IV Dung Ephipanias, 29 Januari 2023, hupaborhat ma hamu mandalani ombas Pansiun sian ulaon Hasintuaon i. Selamat Pansiun ma di hamu, ninna Pandita resort Anwar P Nababan.


Mandok hata ma sian inanta St. Piolenta Lydia Mariany br Silaen naung pansiun. Mandok hata mauliate tu Tuhanta ala Tuhanta do na tongtong mandongani dohot mangaramoti gulmit ni ngolunasida, jala saleleng mandalanhon hasintuaon nasida. Godang na boi ta ula di bagas ni porlak ni Debata, boi marhite pelayanan di segala aspek.

Atik adong na sala di panghobasion, di langka manang na hurang dasip di panghobasion nasida. Nasida mangido maaf. Tu dongan sintua, tu angka ruas do tu sude tahe. Hirahira ido astuan ni hata sambutan nasida.



Mandok hata ma muse utusan ruas ni huria, sahalak utusan ni Sektor Jerusalem, sahalak utusan Sian Katua Marturia, Diakonia, Koinonia laos pasahat cenderamata (tintin mas, ulos dohot tukkot) na gabe tanda asa adong do siingoton nasida. Dung sidung parmingguon dipatupa ma acara ramah tamah.



Comments


bottom of page